Inicio
  Obxectivos
  Proxectos
  Manifestos
  Documentos da     Asociación
     Manifesto      Agabel
     Diagnónstico
     Plano de B.E.
  Asociate
  Noticias
  Recursos
  Enlaces

 

ASOCIACIÓN GALEGA POLAS BIBLIOTECAS ESCOLARES E A LECTURA

MANIFESTO A FAVOR DAS BIBLIOTECAS ESCOLARES

"No habiendo aprendido a leer, no es posible aprender a estudiar"
Rubén Darío"

A sociedade contemporánea baséase na información como canle de acceso á construcción do coñecemento e a escola debe contemplar entre os seus obxectivos a formación do seu alumnado na recollida, selección recuperación, elaboración e transmisión da mesma.

A Lei Orgánica Xeral do Sistema Educativo (LOXSE) e as disposicións que a desenvolven, conscientes desta realidade, recollen explícitamente nos diferentes currículos, contidos que abordan o manexo das diferentes fontes de información así como a formación lectora dos seus alumnos e alumnas. A biblioteca escolar ten un papel destacado nesta función, pero que se poida desenvolver ou non, pasa polo establecemento dunha concepción da biblioteca como centro de recursos multimedia que pon a disposición da comunidade educativa todo tipo de material independentemente do soporte no que se presente e aporta posibilidades para abordar o ensino dun xeito innovador. Entendida deste xeito, a biblioteca tería entre outras, as seguintes funcións:

• Satisfacer as necesidades educativas, culturais, de ocio, formación e información de toda a comunidade escolar e aportar posibilidades para abordar o ensino dun xeito diferente, atendendo tamén ás necesidades de servicios e materiais específicos para aquelas persoas que non poidan empregar as canles ordinarias de acceso á información.

• Crear e fomentar o gusto pola lectura de todo tipo de linguaxes e en todo tipo de soportes así como o hábito de uso das bibliotecas –escolares, municipais,...- e de calquera outro servicio de información.

• Crear a necesidade de vivir informados, do xeito máis obxectivo posible, para poder exercer a nosa liberdade individual e como colectivo nunha sociedade democrática.

• Formar e orientar na búsqueda, recuperación, análise, e elaboración da información. Trátase, en definitiva, de proporcionar estratexias para aprender a aprender, promovendo o pensamento crítico e a actitude reflexiva así como a expresión e a creatividade.

• Actuar como elemento compensador das desigualdades de orixe social, potenciando o acceso aos recursos e á información daqueles nenos e nenas que non dispoñen dos mesmos no seu entorno.

Evidentemente, desenvolver estas funcións só é factible se:

1. As bibliotecas escolares dispoñen dun marco lexislativo, que defina o seu lugar no marco educativo, e de políticas específicas que apoien o seu desenvolvemento.
    
2. Son consideradas como un departamento máis dos que integran a estructura organizativa do centro, con entidade e proxecto propios integrados nos documentos programáticos e de xestión do centro. Este departamento estaría integrado por un responsable –un docente con formación específica e permanente e por unha comisión na que estarían representados os diferentes departamentos, ciclos, niveis e áreas así como o alumnado e familias.
    
3. A administración educativa garantiza que o docente responsable da biblioteca teña, para desenvolver as súas función, o 50% do seu horario lectivo e complementario, con tendencia a unha dedicación exclusiva.
    
4. Todo o material documental pasa pola biblioteca para o seu rexistro e catalogación independentemente do seu lugar de ubicación definitiva. Asimesmo, e en aras dunha maior racionalización e optimización dos recursos, toda compra de material didáctico de calquera departamento debería ser aprobada pola Comisión da Biblioteca.
    
5. Conta cun fondo documental adecuado e actualizado así como con instalacións e equipamentos apropiados ás súas funcións, que aseguren o libre acceso aos fondos por parte dos usuarios. Isto supón a necesidade dunha dotación inicial pero tamén dunha dotación económica permanente que, segundo as recomendacións internacionais, debería supór, como mínimo o 10% do presuposto total do centro.
    
6. Dispón dun espacio axeitado e de fácil accesibilidade, nunca inferior ao 0,5% do espacio útil do centro educativo segundo as recomendacións da UNESCO de 1979.
7. 
   O horario de apertura da biblioteca cobre, como mínimo, a xornada lectiva e, nos centros de ensino primario, as horas de denvolvemento de actividades extraescolares.

Como elo final, solicitamos que os gobernos, a través dos seus responsables políticos, elaboren estratexias, políticas e programáticas que permitan aplicar os enunciados do Manifesto da biblioteca escolar da UNESCO / IFLA.

Marzo de 2000

Asociación Galega polas Bibliotecas Escolares e a Lectura
Durán Loriga, 10-1º
15003 A Coruña
Tel.: 981 18 43 84
Fax: 981 18 43 85
Correo Electrónico: agabel2000@hotmail.com y agabel@agabel.net